Kurseni energjinë në banesë

- Këshilla praktike sipas stinëve.
- Pajisjet që konsumojnë më shumë energji.
- Konsumi në “stand-by”.
- Përdorimi efikas i kondicionerit.
- Ngrohja dhe ndriçimi.
Pse është e rëndësishme?

Përdorimi efikas i energjisë ndihmon familjet të:
- ulin faturën mujore të energjisë elektrike;
- reduktojnë humbjet e panevojshme të energjisë;
- zgjasin jetën e pajisjeve elektrike;
- kontribuojnë në mbrojtjen e mjedisit përmes uljes së konsumit të energjisë.
Edhe ndryshime të vogla në sjelljen e përditshme mund të sjellin kursime të konsiderueshme gjatë vitit
10 mënyra të thjeshta për të kursyer energji:
- Përdorni ndriçim LED.
Llambat LED konsumojnë deri në 80–90% më pak energji dhe zgjasin shumë më tepër se llambat tradicionale.

Këshillë: Zëvendësoni fillimisht llambat që përdoren më shpesh në shtëpi.
- Përdorni kondicionerin në temperaturë optimale
- Verë: 24–26°C
- Dimër: 19–20°C
Çdo gradë më e ulët në verë ose më e lartë në dimër rrit konsumin e energjisë.
- Shkëputni pajisjet që nuk përdoren.
Televizori, dekoderi, karikuesit, printeri dhe pajisje të tjera konsumojnë energji edhe kur janë në modalitetin Stand-by.

Këshillë: Përdorni shumëfish me çelës për t'i fikur njëherësh.
- Përdorni lavatriçen dhe enëlarësen me ngarkesë të plotë.
Programet ECO dhe përdorimi me kapacitet të plotë konsumojnë më pak energji dhe ujë për kilogram rrobash apo enësh.
- Mos vendosni frigoriferin pranë burimeve të nxehtësisë.
Frigoriferi punon më shumë nëse ndodhet pranë:
- sobës;
- furrës;
- radiatorit;
- dritares me diell.
Rekomandohet temperatura e frigoriferit:
Rreth +6–7 gradë C
Ngrirësi: rreth -18 gradë C
Shkrirjen periodike kur nevojitet

Këshillë: Lini hapësirë për ajrosje pas tij.

Kufizoni përdorimin e boilerit.
Rregulloni temperaturën e bojlerit sipas udhëzimeve të prodhuesit dhe nevojave të familjes, duke shmangur temperaturat e panevojshme të larta
Fikeni dhe vendoseni në modalitetin ekonomik kur nuk nevojitet për periudha të gjata, nëse kjo lejohet nga pajisja.
Izoloni banesën.

Izolimi i mirë i dyerve dhe dritareve ndihmon në ruajtjen e temperaturës së brendshme dhe ul nevojën për ngrohje ose ftohje.

Përdorni dritën natyrale.

Hapni perdet gjatë ditës dhe fikni ndriçimin artificial kur nuk është i nevojshëm.

Gatuani me efikasitet
përdorni tenxhere me kapak;
zgjidhni enë me madhësi të përshtatshme për vatër;
shmangni hapjen e shpeshtë të furrës.
Monitoroni konsumin:

Lexoni rregullisht matësin dhe kontrolloni faturën për të kuptuar se cilat periudha ose pajisje ndikojnë më shumë në konsum.

Për më shumë detaje, linku:

_{International Energy Agency (IEA) – Saving Energy: https://www.iea.org/topics/saving-energy;}
_{European Commission – Save electricity the easy way: https://energy-behaviour-forum.ec.europa.eu/resource-hub/campaign-materials;}
_{European Commission – Energy-efficient products: https://energy-efficient-products.ec.europa.eu/index_en;}
_{S. Department of Energy – Home Energy Checklist: https://www.energy.gov/cmei/femp/home-energy-checklist;}
_{S. Department of Energy – Residential Water Heaters: https://www.energy.gov/cmei/buildings/consumer-water-heaters}

2. Çfarë pajisjesh konsumojnë më shumë energji?

Pajisja elektrike	Niveli i konsumit të energjisë	Vlerësimi
Kondicioneri	Shumë i lartë	🔴
Boileri elektrik	Shumë i lartë	🔴
Furra elektrike	i lartë	🟠
Pllaka elektrike	I lartë	🟠
Tharësja e rrobave	I lartë	🟠
Lavatriçja	Mesatar	🟡
Enëlarësja	Mesatar	🟡
Frigoriferi	Mesatar (punon vazhdimisht)	🟡
Televizori	I ulët	🟢
Ndriçimi LED	Shumë i ulët	🔵

Shënim: klasifikimi është orientues. Konsumi i energjisë elektrike varet nga fuqia e pajisjes, efikasiteti energjetik, kohëzgjatja dhe mënyra e përdorimit. Një pajisje me fuqi të lartë nuk do të thotë domosdoshmërisht se do të ketë konsumin më të madh në faturë, pasi rëndësi ka edhe koha e përdorimit.

Gabimet më të zakonshme

Lënia e kondicionerit me dritare të hapura.
Lënia e llambave ndezur në dhoma që nuk përdoren.
Mbajtja e pajisjeve në “Stand-by”.
Hapja e shpeshtë e frigoriferit.
Vendosja e ushqimit të nxehtë në frigorifer.
Përdorimi i bojlerit 24 orë në ditë, kur nuk është i nevojshëm.
Mungesa e mirëmbajtjes së filtrave të kondicionerit.

Këshilla sipas stinëve:

Në verë:
Vendosni kondicionerin në 24–26°C.
Mbani të mbyllura dritaret gjatë funksionimit.
Përdorni perde ose grila për të kufizuar rrezet e diellit.
Në dimër:
Vendosni temperaturën në 20–22°C.
Izoloni mirë dritaret dhe dyert.
Shfrytëzoni dritën dhe ngrohtësinë natyrale gjatë ditës.

Për më shumë detaje, linku:

_{International Energy Agency (IEA) – Saving Energy : https://www.iea.org/topics/saving-energy;}
_{European Commission – Energy Efficient Products: https://energy-efficient-products.ec.europa.eu/index_en;}
_{European Commission – Washing Machines / Dishwashers : https://energy-efficient-products.ec.europa.eu/product-list/dishwashers_en;}
_{European Commission – Standby, networked standby and off mode: https://energy-efficient-products.ec.europa.eu/product-list/standby-networked-standby-and-mode_en.}

Etiketa energjetike

Një udhëzues praktik:

Ky material i ndihmon konsumatorët të kuptojnë etiketën energjetike dhe të krahasojnë pajisjet elektrike përpara blerjes, duke marrë parasysh jo vetëm çmimin fillestar, por edhe konsumin e energjisë dhe karakteristika të tjera të rëndësishme të produktit. Komisioni Evropian e konsideron etiketën energjetike një instrument për t'u mundësuar konsumatorëve të zgjedhin produkte më efikase dhe për të nxitur prodhuesit drejt teknologjive më efikase.

si lexohet etiketa A–G;
çfarë nënkupton konsumi vjetor;
krahasimi i pajisjeve;
si të zgjedhësh pajisjen më ekonomike.

Çfarë është etiketa energjetike?

Etiketa energjetike është një mjet informues që ndihmon konsumatorët të krahasojnë efikasitetin energjetik të pajisjeve elektrike dhe të zgjedhin produkte që konsumojnë më pak energji dhe kanë kosto më të ulëta përdorimi.

Ajo vendoset në një gamë të gjerë pajisjesh, si:

frigoriferë dhe ngrirës;
lavatriçe;
tharëse rrobash;
enëlarëse;
televizorë dhe monitorë;
burime ndriçimi (llamba);
kondicionerë (për disa kategori përdoren etiketa sipas rregullave specifike).

1. Si lexohet etiketa A–G?

Që nga viti 2021, Bashkimi Evropian ka rikthyer një sistem më të thjeshtë klasifikimi nga A deri në G, duke hequr klasat A+, A++ dhe A+++.

Klasa	Kuptimi
🟢 A	Efikasitet shumë i lartë – (konsum minimal energjie)
🟢 B	Shumë efikase
🟡 C	Efikasitet i mirë
🟡 D	Efikasitet mesatar
🟠 E	Konsum relativisht më i lartë
🔴 F	Pajisje me efikasitet të ulët
🔴 G	Pajisje me konsumin më të lartë të energjisë

E rëndësishme: Për shkak të standardeve më të rrepta të testimit, shumë pajisje që më parë klasifikoheshin si A+++, sot mund të klasifikohen si B ose C. Kjo nuk do të thotë se janë bërë më pak efikase, por se shkalla e vlerësimit është rikalibruar për të nxitur zhvillimin e teknologjive edhe më efikase.

2. Çfarë informacioni përmban etiketa?

Përveç klasës së efikasitetit energjetik, etiketa mund të përfshijë:

Klasën e efikasitetit energjetik;
konsumin e energjisë (zakonisht në kWh/vit ose kWh për 100 cikle, sipas llojit të pajisjes);
kapacitetin e pajisjes;
konsumin e ujit (për lavatriçe dhe enëlarëse);
nivelin e zhurmës (dB);
kohëzgjatjen e programeve standarde;
një kod QR, i cili çon në bazën evropiane të të dhënave të produkteve (EPREL), ku konsumatori mund të konsultojë specifikimet teknike të pajisjes.

Çfarë është EPREL?

EPREL – European Product Registry for Energy Labelling është baza evropiane ku regjistrohen modelet e produkteve që i nënshtrohen kërkesave për etiketimin energjetik. Konsumatori mund të konsultojë informacion më të detajuar për një produkt, ndërsa për kategoritë përkatëse mund të hyjë në informacion duke skanuar kodin QR të etiketës.

4. Çfarë nënkupton konsumi vjetor?

Konsumi vjetor i energjisë tregon sasinë e energjisë elektrike që pajisja pritet të konsumojë gjatë një viti, sipas kushteve standarde të testimit.

Shembull:

Frigoriferi A → 100 kWh/vit
Frigoriferi D → 190 kWh/vit

Çmimi i energjisë elektrike është 9.5 lekë/kWh:

Pajisja A: 950 lekë/vit
Pajisja D: 1,805 lekë/vit

Diferenca është 855 lekë çdo vit. Gjatë një jetëgjatësie 10-vjeçare, kursimi mund të arrijë rreth 8,550 lekë, pa përfshirë ndryshimet e mundshme të çmimit të energjisë.

Vlerat reale të konsumit varen nga mënyra e përdorimit, temperatura e ambientit, mirëmbajtja dhe kushtet e instalimit të pajisjes.

5. Si të krahasoni pajisjet?

Kur krahasoni dy ose më shumë pajisje, mos u bazoni vetëm te çmimi i blerjes.

Merrni në konsideratë:

klasën e efikasitetit energjetik;
konsumin e energjisë;
kapacitetin e pajisjes;
nivelin e zhurmës;
konsumin e ujit (kur është i zbatueshëm);
garancinë dhe jetëgjatësinë e pritshme.

Kostoja totale e pajisjes (blerje + përdorim gjatë viteve) është shpesh një tregues më i mirë sesa çmimi fillestar.

6. Si të zgjidhni pajisjen më ekonomike?

Para blerjes, pyesni veten:

A ka kapacitetin që i përshtatet nevojave të familjes?
A ka një klasë të lartë efikasiteti energjetik?
Sa energji konsumon gjatë një viti?
A është niveli i zhurmës i përshtatshëm për ambientin ku do të vendoset?
A justifikon kursimi i energjisë diferencën në çmimin e blerjes?

Në shumë raste, një pajisje me çmim fillestar pak më të lartë mund të rezultojë më ekonomike gjatë gjithë jetës së saj për shkak të konsumit më të ulët të energjisë.

7. Këshilla praktike për konsumatorin:

Lexoni gjithmonë etiketën energjetike përpara blerjes.
Krahasoni pajisje me të njëjtin funksion dhe kapacitet.
Konsideroni koston e përdorimit gjatë gjithë jetës së pajisjes, jo vetëm çmimin e blerjes.
Verifikoni informacionin teknik përmes kodit QR të etiketës në bazën EPREL.
Mirëmbani pajisjet sipas udhëzimeve të prodhuesit, pasi edhe pajisjet më efikase mund të konsumojnë më shumë energji nëse nuk përdoren ose mirëmbahen siç duhet.

Për më shumë detaje:

_{European Commission – Energy Efficient Products- https://energy-efficient-products.ec.europa.eu/index_en}
_{Understanding the Energy Label – European Commission: https://energy-efficient-products.ec.europa.eu/ecodesign-and-energy-label/understanding-energy-label_en;}
_{European Commission – EPREL: https://eprel.ec.europa.eu/screen/home;}
_{EPREL: generated labels and PDFs: https://energy-efficient-products.ec.europa.eu/suppliers/eprel-generated-labels-and-pdfs_en}

Vetëprodhuesi

kush mund të bëhet vetëprodhues;
procedurat;
lidhja në rrjet;
skema e kompensimit;
pyetje të shpeshta;

Çfarë është një vetëprodhues?

Vetëprodhuesi është një konsumator që prodhon energji elektrike nga burime të rinovueshme, kryesisht për të mbuluar nevojat e veta, ndërsa energjia e tepërt mund të injektohet në rrjet sipas kushteve të përcaktuara në legjislacionin dhe aktet rregullatore në fuqi.

Ky model u mundëson konsumatorëve të jenë jo vetëm përdorues të energjisë, por edhe prodhues të saj.

1. Kush mund të bëhet vetëprodhues?

Statusin e vetëprodhuesit mund ta fitojnë konsumatorët që plotësojnë kushtet e përcaktuara në legjislacionin në fuqi, duke përfshirë:

konsumatorët familjarë;
subjektet tregtare;
institucionet publike;
persona juridikë të tjerë që instalojnë sisteme për prodhimin e energjisë nga burime të rinovueshme për vetëkonsum.

Instalimi duhet të respektojë kufijtë teknikë dhe kriteret e përcaktuara nga operatori i rrjetit dhe nga aktet e miratuara nga ERE.

Cilat janë përfitimet?

Të qenit vetëprodhues sjell një sërë përfitimesh:

ulje të faturës së energjisë elektrike;
përdorim më efikas të energjisë së prodhuar;
mundësi kompensimi për energjinë e dorëzuar në rrjet sipas skemës në fuqi;
rritje të pavarësisë energjetike;
kontribut në përdorimin e burimeve të rinovueshme dhe reduktimin e emetimeve të gazeve serrë.

2. Procedura për t'u bërë vetëprodhues

Procesi përfshin disa hapa kryesorë:

Hapi 1 – Vlerësimi i nevojave

Konsumatori vlerëson konsumin vjetor të energjisë dhe kapacitetin e sistemit që synon të instalojë.

Hapi 2 – Paraqitja e kërkesës

Kërkesa për lidhje paraqitet pranë operatorit të rrjetit të shpërndarjes, së bashku me dokumentacionin teknik të kërkuar.

Hapi 3 – Shqyrtimi teknik

Operatori i rrjetit verifikon:

kapacitetin e rrjetit;
përputhshmërinë teknike të instalimit;
kushtet për lidhjen në rrjet.

Hapi 4 – Lidhja në rrjet

Pas miratimit, realizohet lidhja e impiantit dhe instalohen pajisjet e nevojshme të matjes.

Hapi 5 – Fillimi i vetëprodhimit

Pas përfundimit të procedurave dhe aktivizimit të matjes, vetëprodhuesi mund të fillojë prodhimin dhe vetëkonsumin e energjisë.

3. Lidhja në rrjet

Lidhja në rrjet realizohet sipas rregullave të miratuara nga ERE.

Këto rregulla përcaktojnë:

dokumentacionin që duhet të paraqitet;
afatet për shqyrtimin e kërkesës;
kriteret teknike të lidhjes;
përgjegjësitë e operatorit të rrjetit;
të drejtat dhe detyrimet e vetëprodhuesit.

Qëllimi është të garantohet një lidhje transparente, jodiskriminuese dhe e sigurt për të gjithë përdoruesit e rrjetit.

4. Skema e kompensimit

Energjia e prodhuar nga vetëprodhuesi përdoret fillimisht për mbulimin e konsumit të tij. Energjia e tepërt e dorëzuar në rrjet kompensohet sipas rregullave të miratuara nga ERE.

Skema e kompensimit përcakton:

mënyrën e matjes së energjisë së marrë dhe të dorëzuar;
mënyrën e llogaritjes së kompensimit;
periudhat e shlyerjes së balancës së energjisë;
detyrimet e operatorit të rrjetit dhe të furnizuesit.

Ky mekanizëm synon të nxisë investimet në energjinë diellore dhe të sigurojë trajtim të drejtë për vetëprodhuesit.

Të drejtat e vetëprodhuesit

Vetëprodhuesi ka të drejtë:

të aplikojë për lidhje në rrjet;
të marrë përgjigje brenda afateve të përcaktuara;
të përfitojë nga skema e kompensimit sipas kushteve në fuqi;
të informohet për procedurat dhe tarifat;
të paraqesë ankesë pranë operatorit ose ERE-s, sipas kompetencave përkatëse, në rast mosmarrëveshjeje.
Detyrimet e vetëprodhuesit

Vetëprodhuesi duhet:

të respektojë kushtet teknike të lidhjes;
të përdorë pajisje që plotësojnë standardet në fuqi;
të lejojë aksesin për kontrollin dhe matjen, sipas legjislacionit në fuqi;
të respektojë kushtet kontraktore me operatorin e rrjetit dhe furnizuesin.

5. Pyetje të shpeshta (FAQ)

A mund të instaloj panele fotovoltaike në banesën time?

Po, nëse plotësohen kushtet teknike dhe procedurat e përcaktuara nga legjislacioni dhe aktet rregullatore në fuqi.

A kam nevojë për miratim nga ERE?

Jo. Procedurat e aplikimit dhe lidhjes kryhen pranë operatorit të rrjetit sipas rregullave të miratuara nga ERE. ERE nuk lëshon miratime individuale për instalimin e impianteve.

Çfarë ndodh me energjinë që nuk e konsumoj?

Energjia e tepërt mund të injektohet në rrjet dhe trajtohet sipas skemës së kompensimit të miratuar nga ERE.

Kush vendos për lidhjen në rrjet ?

Operatori i rrjetit të shpërndarjes, bazuar në kushtet teknike dhe procedurat e miratuara.
Ku mund të drejtohem nëse kam një mosmarrëveshje?

Fillimisht pranë Operatorit të Rrjetit të Shpërndarjes ose Furnizuesit. Nëse mosmarrëveshja nuk zgjidhet, konsumatori mund t'i drejtohet ERE-s, në përputhje me kompetencat e saj
për shqyrtimin e mosmarrëveshjeve dhe mbrojtjen e konsumatorëve.

Automjetet elektrike

Mënyrat e karikimit;
Karikimi në banesë;
Karikimi publik;
Ndikimi në faturë;
Çfarë është një automjet elektrik?
Automjeti elektrik është një mjet transporti që përdor energjinë elektrike të ruajtur në bateri për të furnizuar motorin elektrik.

Ndryshe nga automjetet me motor me djegie të brendshme, automjetet elektrike:
- nuk konsumojnë karburante fosile gjatë përdorimit;
- kanë efikasitet më të lartë energjetik;
- reduktojnë emetimet lokale dhe zhurmën;
- mund të karikohen në banesë ose në pika publike karikimi.
1. Mënyrat e karikimit të automjeteve elektrike
Karikimi i automjeteve elektrike mund të realizohet në mënyra të ndryshme, në varësi të fuqisë së karikuesit dhe kohës së nevojshme.
1. Karikimi në banesë (karikim privat)
Ky është mënyra më e zakonshme për përdoruesit familjarë. Mund të realizohet:
- nga një prizë standarde elektrike;
- nga një karikues i dedikuar (Wallbox).
Karikimi në banesë zakonisht:
- ka fuqi më të ulët;
- kërkon kohë më të gjatë;
- ka kosto më të parashikueshme;
- përdor energjinë elektrike të kontraktuar nga konsumatori.
1. Karikimi publik
Pikat publike të karikimit ofrojnë mundësi karikimi në:
- ambiente publike;
- qendra tregtare;
- parkingje;
- pika shërbimi;
- zona të dedikuara.
Karikuesit publikë mund të kenë fuqi më të lartë dhe mundësojnë karikim më të shpejtë. Ato mund të klasifikohen në:
- karikim normal (AC) – zakonisht me fuqi më të ulët dhe kohë më të gjatë;
- karikim i shpejtë (DC) – fuqi më e lartë dhe kohë më e shkurtër karikimi.
- Çfarë duhet të dijë konsumatori për karikimin në banesë?
Përpara instalimit të një karikuesi në banesë, konsumatori duhet të vlerësojë:
- fuqinë e disponueshme të lidhjes elektrike;
- kapacitetin e instalimit elektrik të banesës;
- nevojën për rritje të fuqisë së kontraktuar;
- pajisjet mbrojtëse elektrike.
Një karikues i instaluar në mënyrë profesionale garanton:
- siguri më të lartë;
- përdorim më efikas të energjisë;
- mbrojtje të instalimit elektrik.
- A është më ekonomik karikimi në banesë?
Në përgjithësi, karikimi në banesë mund të jetë më ekonomik sesa karikimi publik, pasi konsumatori paguan energjinë sipas kushteve të furnizimit të kontratës së tij.

Megjithatë, kostoja reale varet nga:
- konsumi i automjetit (kWh/100 km);
- Fuqia e instaluar e pikës së lidhjes;
- Mënyra e përdorimit të automjetit;
- Humbjet gjatë procesit të karikimit.
1. Ndikimi në faturën e energjisë elektrike
Përdorimi i një automjeti elektrik rrit konsumin total të energjisë elektrike të një familjeje.
- Shembull orientues: Një automjet elektrik që konsumon: 18 kWh / 100 km dhe përshkon: 1 000 km në muaj do të kërkojë afërsisht: 180 kWh energji elektrike në muaj Kjo sasi i shtohet konsumit normal familjar.
- Si të karikoni në mënyrë efikase?
Për të reduktuar kostot:
- Karikoni kur automjeti nuk përdoret për periudha të gjata.
- Shmangni karikimin e panevojshëm deri në kapacitet maksimal nëse prodhuesi rekomandon ndryshe.
- Përdorni programimin e karikimit, kur automjeti ose pajisja e lejon.
- Nëse dispononi impiant fotovoltaik, mund të përdorni energjinë e prodhuar për karikimin e automjetit.
1. Tarifat për karikimin e automjeteve elektrike
Tarifa që paguan konsumatori varet nga mënyra e karikimit:
- Karikimi në banesë: Kur automjeti karikohet në banesë, energjia elektrike faturohet sipas kushteve të furnizimit të konsumatorit dhe tarifës përkatëse të energjisë elektrike të miratuar nga ERE.
Për konsumatorët familjarë, për vitin 2026, çmimi i energjisë elektrike është:
- 5 lekë/kWh për konsum deri në 700 kWh në muaj;
- 5 lekë/kWh për konsum 701 kWh e më tej, për të gjithë sasinë e konsumuar gjatë muajit.
- Karikimi në pika publike: Në pikat publike, përdoruesi paguan sipas modelit të biznesit të operatorit të pikës së karikimit dhe tarifave të aplikuara. Çmimi mund të përfshijë:
- energjinë elektrike të konsumuar;
- shërbimin e karikimit;
- kostot e operimit dhe mirëmbajtjes së infrastrukturës.
Për vitin 2026, ERE ka miratuar çmimin e energjisë aktive për pikat/stacionet e karikimit të makinave elektrike me fuqi të instaluar mbi 11 kW, të lidhura në nivelin e tensionit 0.4 kV:
- 22 lekë/kWh – çmimi i energjisë aktive;
- 3 lekë/kWh – çmimi i energjisë aktive në orarin pik.
- Orari pik është: 1 nëntor – 31 mars: 18:00–22:00; 1 prill – 31 tetor: 19:00–23:00.
1. Pyetje të shpeshta:
- A mund ta karikoj automjetin tim elektrik në banesë?
Po. Karikimi në banesë është i mundur, nëse instalimi elektrik dhe pajisjet janë të përshtatshme për këtë qëllim dhe respektohen kërkesat teknike dhe të sigurisë.

A rritet fatura e energjisë nëse karikoj automjetin në banesë?

Po. Energjia e përdorur për karikimin e automjetit i shtohet konsumit të energjisë elektrike të banesës, nëse karikimi nuk matet veçmas.

Sa energji konsumon një automjet elektrik?

Kjo varet nga modeli i automjetit. Një vlerë prej 18 kWh/100 km mund të përdoret vetëm si shembull orientues dhe nuk përfaqëson konsumin e çdo automjeti.

A është karikimi publik më i shtrenjtë?

Jo domosdoshmërisht në çdo rast. Kostoja varet nga pika e karikimit, fuqia, çmimi i energjisë dhe kushtet e shërbimit.

A ka një çmim të miratuar nga ERE për karikimin e makinave elektrike?

Po. Për vitin 2026, ERE ka miratuar një çmim specifik për energjinë aktive për pikat/stacionet e karikimit me fuqi të instaluar mbi 11 kW, sipas kategorisë dhe kushteve të përcaktuara në vendimin përkatës.

Këshillë për konsumatorin
- Para instalimit të një karikuesi në banesë, kontrolloni fuqinë e disponueshme të lidhjes elektrike dhe sigurohuni që instalimi të jetë i përshtatshëm për ngarkesën shtesë.
- Para përdorimit të një pike publike, kontrolloni çmimin, mënyrën e tarifimit dhe kushtet e shërbimit.
Për më shumë detaje:

ERE:

https://www.ere.gov.al/sq/tarifat/tarifat-dhe-cmimet;

https://www.ere.gov.al/media/files/2025/12/15/Vendim_Nr_322_2025.pdf;

https://www.ere.gov.al/media/files/2025/11/17/media/files/2025/11/03/Vendim_Nr_294_2025.pdf

Monitoroni konsumin tuaj

si lexohet matësi;
si të kontrolloni faturën;
si të evidentoni konsumet anormale;
si të kurseni energji pa ulur komoditetin.

Pse është e rëndësishme të monitoroni konsumin?

Njohja e konsumit të energjisë i ndihmon konsumatorët të:

kuptojnë më mirë faturën e energjisë elektrike;
identifikojnë pajisjet që ndikojnë më shumë në konsum;
zbulojnë në kohë ndryshime të pazakonta të konsumit;
marrin masa për reduktimin e konsumit pa cenuar komoditetin;
kontrollojnë më mirë shpenzimet mujore për energjinë.

Një konsumator i informuar mund të marrë vendime më të mira për përdorimin e energjisë.

Si lexohet matësi i energjisë elektrike?

Matësi i energjisë elektrike regjistron sasinë e energjisë së konsumuar nga instalimi elektrik i konsumatorit.

Konsumi matet në: kWh (kilovat-orë)

Një kilovat-orë përfaqëson energjinë e konsumuar nga një pajisje me fuqi 1 kW që punon për një orë.

Çfarë duhet të kontrollojë konsumatori?

Në matës mund të kontrolloni:

indeksin aktual të konsumit;
ndryshimin e konsumit krahasuar me periudhat e mëparshme;
nëse matësi funksionon normalisht.

Për matësit elektronikë:

ekrani shfaq të dhëna të ndryshme përmes kodeve ose faqeve të ekranit;
konsumi total zakonisht identifikohet me treguesin kWh.

Si të kontrolloni konsumin në mënyrë praktike?
Lexoni indeksin e matësit në të njëjtën ditë çdo muaj.
Shënoni vlerën e regjistruar.
Llogaritni diferencën:

Konsumi mujor = Leximi aktual – Leximi i muajit të kaluar

Shembull:

Muaji i kaluar: 15 500 kWh
Muaji aktual: 15 850 kWh

Konsumi: 350 kWh

Si të kontrolloni faturën e energjisë elektrike?

Fatura e energjisë duhet të jetë e qartë dhe transparente për konsumatorin. Në faturë konsumatori duhet të kontrollojë:

Të dhënat kryesore

Emrin dhe të dhënat e kontratës;
Periudhën e faturimit;
Numrin e matësit;
Indeksin fillestar dhe përfundimtar;
Sasinë e energjisë së konsumuar (kWh);
Vlerën totale për pagesë.
Konsumi i faturuar

Një nga elementët më të rëndësishëm është sasia e energjisë së faturuar në kWh. Konsumatori duhet ta krahasojë këtë vlerë me:

konsumin e muajve të mëparshëm;
numrin e personave në banesë;
përdorimin e pajisjeve elektrike;
ndryshimet sezonale.

Si të evidentoni konsumet anormale?

Një rritje e konsumit nuk do të thotë gjithmonë problem me matësin. Ajo mund të shkaktohet nga:

përdorimi më intensiv i kondicionerit;
ngrohja elektrike gjatë dimrit;
shtimi i pajisjeve të reja;
ndryshimi i numrit të personave në banesë;
qëndrimi më i gjatë në shtëpi.

Megjithatë, konsumatori duhet të verifikojë rastet kur:

konsumi rritet ndjeshëm pa ndryshim në mënyrën e përdorimit;
pajisjet janë fikur por matësi vazhdon të regjistrojë konsum të lartë;
fatura ndryshon shumë nga muajt e mëparshëm.

Si të bëni një kontroll të thjeshtë?

Testi me fikjen e pajisjeve

Fikni pajisjet elektrike që mund të shkëputen.
Kontrolloni matësin.
Vëzhgoni nëse vazhdon regjistrimi i konsumit.

Nëse ka një konsum të pazakontë, konsumatori duhet:

të kontrollojë instalimin elektrik;
të verifikojë pajisjet;
të kontaktojë operatorin për verifikim kur është e nevojshme.

Pajisjet që mund të shkaktojnë rritje të konsumit

Kondicioneri: Konsumi varet nga:

fuqia e pajisjes;
temperatura e vendosur;
izolimi i ambientit;
koha e përdorimit.

Boiler elektrik: Është ndër konsumatorët më të mëdhenj në banesë. Ndikojnë:

temperatura e vendosur;
kohëzgjatja e ndezjes;
numri i përdoruesve.

Ngrohja elektrike: Pajisjet elektrike për ngrohje mund të rrisin ndjeshëm konsumin gjatë muajve të dimrit.
Pajisjet në modalitet "Stand-by": Edhe kur nuk përdoren aktivisht, disa pajisje vazhdojnë të konsumojnë energji (si psh: televizorë; dekoderë; pajisje elektronike; karikues.)

Si të kurseni energji pa ulur komoditetin?

Kursimi i energjisë nuk do të thotë heqje dorë nga shërbimet që ofrojnë pajisjet elektrike, por përdorim më i zgjuar i tyre.

Përdorni temperaturat optimale

Kondicioneri:

verë: 24–26°C;
dimër: 20–22°C.

Ndryshimet e vogla në temperaturë mund të sjellin ulje të konsumit.

Përdorni pajisjet në mënyrë efikase:
Mbushni lavatriçen dhe enëlarësen përpara përdorimit.
Përdorni programet ekonomike.
Shmangni ndezjen dhe fikjen e shpeshtë të pajisjeve kur nuk është e nevojshme.

Mirëmbani pajisjet:

Pajisjet e mirëmbajtura punojnë më eficientisht, si:

pastroni filtrat e kondicionerit;
kontrolloni izolimin e frigoriferit;
mos lejoni krijimin e shtresave të akullit në ngrirës.

Këshillë për konsumatorin

Një faturë më e lartë fillon të kuptohet duke analizuar konsumin në kWh, jo vetëm vlerën në lekë. Monitorimi periodik i konsumit i jep konsumatorit mundësinë të kuptojë:

sa energji përdor;
kur e përdor;
cilat pajisje ndikojnë më shumë;
ku mund të kursejë.

Mesazhi: Lexoni matësin. Kontrolloni faturën. Kuptoni konsumin. Përdoreni energjinë me zgjuarsi.

Për më shumë detaje, linku:

ERE: https://www.ere.gov.al/media/files/2025/11/20/Vendim_Nr_299_2025.pdf;
https://www.ere.gov.al/media/files/2025/11/17/media/files/2025/11/03/Vendim_Nr_294_2025.pdf;
European Commission, Energy Efficient Products: https://energy-efficient-products.ec.europa.eu/index_en;
European Commission, EPREL – European Product Registry for Energy Labelling: https://eprel.ec.europa.eu/screen/home
European Union, Your Europe – Energy labels: https://europa.eu/youreurope/business/product-rules-compliance/energy-related-products/energy-labelling/index_en.htm

Kalkulatorë

kalkulator i konsumit mujor;
kalkulator i kursimit pas zëvendësimit të pajisjeve;
kalkulator për ndriçimin LED;
kalkulator për instalimin e paneleve fotovoltaike.

Video dhe infografikë

"10 mënyra për të kursyer energji"
"Si lexohet fatura";
"Si funksionon matësi inteligjent";
"Si bëheni vetëprodhues".

Legjislacioni dhe vendimet e ERE

Një faqe që grumbullon:

vendimet e Bordit që lidhen me vetëprodhuesit;
tarifat;
matjen inteligjente;
konsumatorin;
integrimin e energjisë së rinovueshme.

Kuadri ligjor

Ligji nr. 59/2026 “Për sektorin e energjisë elektrike”

Ky ligj përcakton kuadrin e përgjithshëm për:

funksionimin e sektorit të energjisë elektrike;
të drejtat dhe detyrimet e klientëve;
aksesin në rrjet;
funksionimin e tregut të energjisë elektrike;
integrimin e burimeve të rinovueshme dhe zhvillimin e një sistemi energjetik të qëndrueshëm.
Ligji nr. 24/2023 “Për nxitjen e përdorimit të energjisë nga burimet e rinovueshme”

Ky ligj krijon kuadrin për:

promovimin e përdorimit të energjisë nga burimet e rinovueshme;
zhvillimin e prodhimit të energjisë së rinovueshme;
mekanizmat për nxitjen e investimeve;
integrimin e energjisë së prodhuar nga burimet e rinovueshme në sistemin energjetik.

Aktet nënligjore

VKM nr. 368, datë 20.05.2026 “Për miratimin e rregullave dhe procedurave të lidhjes në rrjetin e shpërndarjes për vetëprodhuesit e energjisë së rinovueshme dhe të skemës së kompensimit të tyre, bazuar në metodologjinë e faturimit neto”
Strategjia e re për ndërgjegjësimin mbi kursimin e energjisë dhe përdorimin e burimeve alternative

Ky akt përcakton:

rregullat dhe procedurat për lidhjen e vetëprodhuesve në rrjetin e shpërndarjes;
kërkesat për aplikim;
procedurat teknike;
mënyrën e matjes së energjisë së prodhuar dhe të konsumuar;
mekanizmin e kompensimit të energjisë së prodhuar dhe të injektuar në rrjet.

Vendimet e Bordit të ERE-së që lidhen me vetëprodhuesit

Në këtë nënseksion duhet të publikohen vetëm aktet e miratuara nga ERE, për shembull:

vendime që lidhen me miratimin ose ndryshimin e metodologjive tarifore;
vendime që lidhen me kushtet e licencimit;
vendime për rregullat teknike dhe procedurale që janë në kompetencën e ERE-së;
vendime që lidhen me operatorët e rrjetit dhe detyrimet e tyre ndaj përdoruesve.